कौन फूल आधी रतिया न फूलै हे / अंगिका
कौन फूल फूललै रे संझौती रे- कौन फूल आधी रतिया न फूलै हे।
मैया हे कौन रे फुलवा फूलै भोर भीनसरेॅ रे-
रूसली मैया केॅ मनाय न लेवै हे।
बेली फूल फूललै रे संझौती रे- चमेली फूल आधी रतिया न फूलै हे।
मैया हे अड़होल फुलवा फूलै भोर भीनसरेॅ रे-
रूसली मैया केॅ मनाय न लेवै हे।
कौन फूल धरलौं रे सिरौना रे- कौन फूल विछौनमा न धरलोॅ हे।
मैया हे कौन रे फुलवा धरौं रंथ ऊपर रे-
रूसली मैया केॅ मनाय न लेवै हे।
बेली फूल धरलों रे सिरौना रे- चमेली फूल बिछौनमा न धरलोॅ हे।
मैया हे अड़होल फुलवा धरौं रंथ ऊपर रे-
रूसली मैया केॅ मनाय न लेवै हे।
Comments
Post a Comment